डायालिसिज़

किडनी कमु न कंदी हुजे, अहिड़ियुनि हालतुनि में किडनीअ जे कमु कराइण लाइ कमु ईंदड़ हथिराधू तरीक़े खे डायालिसिज़ चइजे थो । डायालिसिज़ द्वारां शरीर जूं ग़ैर ज़रूरी शयूं ऐं पाणी बा॒हिर कढी शरीर में पाणीअ जी घुरिबल अंदाज़ क़ाइम रखी सघिजे थो ।

डायालिसिज़ जा मुख्य कम हेठीअं रीत आहिनि

1. रतु जूं ग़ैर ज़रूरी इख़िराजी शयूं ( जीअं त युरिया, क्रिअेटीनिन ) दूर करे रतु खे साफ करणु ।
2. वधीक पाणी कढी शरीर में पाणीअ जो घुरिबल अंदाज़ क़ाइम रखणु ।
3. घटि वधि मइदिनी लूणनि (जीअं त सोडियम​, पोटेशियम​, बाइकार्बोनेट वग़ैरह​) जो मुनासिब अंदाज़ क़ाइण रखणु ।
4. गडु॒ थियल ऐसिड जे वधीक अंदाज़ खे घटाअे घुरिबल अंदाज़ क़ाइम रखणु ।

डायालिसिज़ हिक हथिराधू पद्वति हुअण सबबु किडनीअ जा कम त करे थी, पर किडनीअ द्वारां ठहंदड़ अेरिथ्रोपोअेटिन हार्मोन ठाहे नथी सघे, जंहिं करे हिमोग्लोबिन जो घुरिबल अंदाज़ क़ाइम नथो रखे सघिजे ऐं हड॒नि खे तंदुरस्त पिणु रखी नथो सघे ।

डायालिसिज़ जी ज़रूरत कड॒हिं पवंदी आहे ?

किडनीअ जी कमु करण जी शक्ति घणे क़दुर घटिजी वञे या किडनी बिल्कुल कमु करणु बंद करे छडे॒ त किडनी शरीर जे गै़र ज़रूरी अनासरनि जो नेकाल करे नती सघे ऐं तड॒हिं दवा द्वारां थींदड़ इलाजु असरदायक नथो रहे ऐं बीमारीअ जूं निशानियूं (अुलिटियूं, दिल कची थियणु, कमिज़ोरी, दमु वगै़रह​) वधंदियूं वञनि थियूं । इन हालत में डायालिसिज़ जी ज़रूरत पवंदी आहे । रवाजी नमूने रतु जी तपास में सीरम क्रिअेटीनिन जो अंदाज़ ८% मि.ग्रा. खां वधी वञे तड॒हिं डायालिसिज़ शुरू क​ई वेंदी आहे ।

छा डायालिसिज़ कराइण सां किडनी वरी कमु करणु शुरू कंदी आहे ?

न​, क्रोनिक किडनी फेल्यर जे मरीज़नि में डायालिसिज़ कराइण सां किडनी वरी कमु न कंदी आहे । अहिड़नि मरीज़नि खे किडनीअ जे कम जे विकल्प तोर डायालिसिज़ हमेशह नेमाइतो कराइणो पवंदो आहे, जेसिताईं मरीज़ किडनी ट्रान्सप्लान्ट न कराअे, तेसिताईं । जेतोणेक अेक्यूट किडनी फेल्यर जे मरीज़नि में डायालिसिज़ जी ज़रूरत थोड़े वक़्त लाइ ई पवंदी आहे । अहिड़नि मरीज़नि में किडनी वरी मुकमल नमूने कम कंदी थी वञण सबबु वरी डायलिसिज़ जी ज़रूरत कड॒हिं बि न पवंदी आहे ।

डायालिसिज़ जा ब॒ क़िसिम आहिनि ?

1. हिमो डायालिसिज़
2. पेरिटोनियल डायालिसिज़​

हिमो डायालिसिज़

हिमो डायालिसिज़ इहा किडनी फेल्यर जे आख़िरी स्टेज जी पद्वति आहे । हिन क़िसिम जे डायालिसिज़ में डायालिसिज़ मशीन ख़ास क़िसिम जे मइदिनी शयुनि वारी पाणियठु (डायलाइसेट​) जे मदद सां हथिराधू किडनीअ (डायलाइसर​) वसीले रतु खे साफ करे थी ।

पेरिटोनियल डायालिसिज़ (पी.डी.)

ही तरीक़ो आख़िरीन तबक़े जे किडनी फेल्यर में कमु ईंदो आहे । हिन क़िसिम जे डायालिसिज़ में पेट में ख़ास क़िसिम जो केथेटर (पी.डी. केथेटर​) रखी, ख़ास क़िसिम जे मइदिनी शयुनि वारी पाणियठु (पी.डी. फ्लुइड​) जी मदद सां शरीर मां कचिरो दूर करे सफाई कई वेंदी आहे । हिन क़िसिम जी डायालिसिज़ मशीन जी मदद खां सवाइ घर में पिणु करे सघिबो आहे ।

डायालिसिज़ में रतु खे साफ करणु कहिड़े सिद्वांत सां थींदो आहे ?

• हिमो डायालिसिज़ में हथिराधू मेम्ब्रेन ऐं पेरिटोनियल डायालिसिज़ में पेरिटोनियम ।
• हिन मेम्ब्रेन (पर्दे) में आयल बारीक सोराख़नि में पाणी, मइदिनी शयूं ऐं गै़र ज़रूरी यूरिया, क्रीअेटीनिन जहिड़ियूं इख़िराजी शयूं पसार थी सघनि थियूं पर शरीर लाइ ज़रूरी रतु जा गाढ़िहा जुज़ा ऐं प्रोटीन पसार थी नथा सघनि ।
• डायालिसिज़ जी प्रक्रिया में सेमीपरमीअेबल मेम्ब्रेन जे हिक पासे डायालिसिज़ जी पाणियठु ऐं बि॒अे पासे शरीर जो रतु हूंदो आहे ।
• ओस्मोसीस ऐं डिफ्युज़न जे सिद्वांत अनूसार रतु जू गै़र ज़रूरी शयूं ऐं वधिक पाणी रतु मां डायालिसिज़ जी पाणियठु में वञी शरीर मां बा॒हिर निकिरी वेंदो आहे ऐं सोडियम , पोटेशियम ऐं एसिड जो अंदाज़ शरीर जी ज़रूरत मूजिबु क़ाइम रहे थो ।

कहिड़े मरीज़ लाइ हिमोडायालिसिज़ ऐं कहिड़े मरीज़ लाइ पेरीटोनियल डायालिसिज़ पसंद कयो वेंदो आहे ?

क्रोनिक किडनी फेल्यर जे इलाज में बि॒न्ही क़िसिमनि जा डायालिसिज़ असरदायक आहिनि । मरीज़ खे बि॒न्ही क़िसिमन जे डायालिसिज़ जे फाइदनि - नुक़िसाननि बाबति जा॒ण डि॒यन बइद मरीज़ जी माली हालत​, तबियत जा जुदा-जुदा पासा, मरीज़ जी रिहाइश खां हिमो डायालिसिज़ सेन्टर जो मुफासिलो वगै़रह गा॒ल्हियूं ध्यान में रखी कहिड़े क़िसिम जो डायालिसिज़ कजे, इहो तइ कयो वेंदो आहे । भारत में घणे भाङे जग॒हियुनि ते हिमो डायालिसिज़ घटि खर्च ते सविलाईअ सां मैसर आहे ऐं इन सबब करे हिमो डायालिसिज़ तरीक़े सां इलाज कराईंदड़ मरीज़नि जो अददु वधीक आहे ।

डायालिसिज़ शुरु थियण बइद छा मरीज़ खे खाधे में परहेज़ रखणु ज़रूरी आहे ?

हा, डायालिसिज़ शुरू थियण बइद पिणु खाधे में माप सिर पाणियठु वठणु, लूणु घटि खाइणु ऐं पोटेशियम या फास्फोरस न वधे इन लाइ ख़बरदारी रखण जी सूचिना डि॒नी वेंदी आहे । पर दवा जो इलाजु हलंदो हुजे उन खां डायालिसिज़ शुरु थियण बइद मरीज़ खे खाधे में वधीक छूट मिलंदी आहे । मरीज़ खे खाधे में वधीक प्रोटीन ऐं विटामिन वारा खाधा खाइण जी सलाह डि॒नी वेंदी आहे ।

"ड्राय वेट​" याने छा ?

"ड्राय वेट​" लफ़िज़ डायालिसिज़ जे मरीज़नि लाइ कमु आणिबो आहे । डायालिसिज़ जी प्रक्रिया में गै़र ज़रूरी कचिरे जे नेकाल बइद मरीज़ जो वज़नु केतिरो हूंदो आहे उन खे "ड्राय वेट​" चइबो आहे । ड्राय वेट जो अंदाज़ हर हिक डायालिसिज़ वक़ित मुनासिब नमूने क़ाइम रखियो वेंदो आहे ।

हिमोडायलिज़​

समूरी दुनिया में डायालिसिज़ कराईंदड़ घणे भाङे मरिज़ हिन क़िसिम जो डायालिसिज़ कराईंदा आहिनि । हिन क़िसिम जे डायालिसिज़ में ख़ास क़िसिम जी मशीन वसीले रतु साफ कयो वेंदो आहे ।

हिमो डायालिसिज़ कहिड़े नमूने थींदो आहे ?

घणे भाङे हिमो डायालिसिज़ डॉक्टर​, नर्स ऐं डायालिसिज़ टेकिनीशियन जी हाज़िरीअ में थींदो आहे ।

• हिमो डायालिसिज़ मशीन जे पम्प जी मदद सां शरीर में हर मिनिट में 300 मि.लि. रतु साफ थियण लाइ हथिराधू किडनीअ में मोकिलियो वेंदो आहे । रतु ज॒मी न वञे, इन लाइ हीपेरीन जो उपयोग कयो वेंदो आहे ।
• हथिराधू किडनी मरीज़ ऐं हिमो डायालिसिज़ मशीन जे विच में रही रतु खे साफु करण जो कमु करे थी । रतु साफु थियण लाइ मशीन जे अंदर न वेंदो आहे ।
• हथिराधू किडनीअ में रतु जो साफु थियणु डायालिसिज़ मशीन द्वारां पहुचाईंदड़ ख़ास क़िसिम जी पाणियठु (डायालाइरेट​) जी मदद सां थींदो आहे ।
• साफु कयलु रतु वरी शरीर में वापस मोकिलियो वेंदो आहे ।
• रवाजी तोर हिमोडायालिसिज़ 4 कलाक हलंदो आहे जंहिं दरम्यान शरीर जो सभु रतु अटिकल 12 दफ़ा साफु थींदो आहे ऐं हिमो डायालिसिज़ हफिते में टे दफ़ा कयो वेंदो आहे ।
• हिमो डायालिसिज़ दरम्यान हमेशह रतु (Blood transfusion)जी ज़रूरत पवंदी आहे, इहा मञिता ग़लत आहे । रतु में हिमोग्लोबिन जो अंदाज़ घटिजी वियो हुजे अहिड़ियुनिहालतुनि में जेकड॒हिं डॉक्टर खे ज़रूरी लगे॒ त ई रतु डि॒नो (चढ़िहायो ) वेंदो आहे ।

साफ करण लाइ रतु कहिड़े नमूने शरीर खां बा॒हिर कढियो वेंदो आहे ?

रतु हासिल करण लाइ (Vascular Access) जा टे तरीका हूंदा आहिनि जिन में डबल ल्यूमेन केथेटर , अे.वी. फिस्च्यूला ऐं ग्राफ्ट जो समावेश थिअे थो ।

ड्बल ल्यूमेन केथेटर (Central Venous Catheter)

यकिदम पहिरियों दफ़ो हिमो डायालिसिज़ करण लाइ हिउ सभ खां वधीक कमु ईंदड़ पद्वति आहे जंहिं में केथेटर रखण बइद यकिदम डायालिसिज़ करे सघिजे थो ।

• हीअ पद्वति (तरीक़ो) थोड़े वक़्त लाइ कमु ईंदी आहे, जेसिताईं ग्राफ्ट या फिस्च्यूला तैयार थिअे ।
• हीअ केथेटर गले में , कुलिहे में या सथर में आयल वडी॒ नसि (Internal Jugular, Sub Clavian or Femoral Vein) में रखिबो आहे जंहिं जी मदद सां हर मिनिट में 300 खां 400 मि.ली. डायालिसिज़ लाइ रतु हासिल करे सघिबो आहे ।
• हीअ केथेटर बा॒हिरिअें छेड़े ते बि॒न अलगु॒ नलियुनि में विरिहायल हूंदी आहे (रतु बा॒हिर कढण ऐं अंदर मोकिलण लाइ) शरीर में दाख़िल थियण खां अगु॒ में ही ब॒ई नलियूं गडि॒जी हिक नली ठही वेंदी आहे (जेका अंदिरां त बि॒नि हिसनि में विरिहायल हूंदी आहे ) ।
• केथेटर में बीमारी लग॒ण जो डपु रहंदड़ हुअण सबबु थोड़े वक़ित जे डायालिसिज़ लाइ हीअ पद्वति पसंद कई वेंदी आहे ।
• ही केथेटर बि॒नि क़िसिमनि जा थींदा आहिनि (1) टनलिड जेको महिननि ताईं हलंदो आहे ऐं (2) नान -टनलिड जेको हफितनि ताईं हलंदो आहे ।

अे.वी. फिस्च्यूला (Arterio Venous (AV) Fistula)

• लंबे अरिसे जे हिमो डायालिसिज़ लाइ सभ खां वधीक कमु ईंदड़ हीअ पद्वति सलामत ऐं सविली हुअण सबबु सुठे में सुठी आहे ऐं हिन बिमारी थियण जो डपु पिणु घटि आहे ।
• हिन पद्वतीअ में रवाजी तरह हथ में कराईअ वटि आयल शरियां (Radial Artery) खे आपरेशन ज़रिये नसि (Caphalic, Vein) सां गंढे छडिबो आहे ।
• शरियां मां वधीक दाब सां ईंदड़ रतु नसि में वञण सां हथ जूं सभेई शरियानियूं फुंडी वेंदियूं आहिनि । इन नमूने नसि खे फूंडण लाइ आम तरह हिक खां चार हफिता लगंदा आहिनि । उन खां पोइ ई उन जो हिमो डायालिसिज़ लाइ थी सघंदो आहे ।
• इन सबब करे यकिदम डायालिसिज़ करण लाइ फिस्च्यूला ठाहे इन जो उपयोग करे नथो सघिजे ।
• इन फुंडियल नसि में बिन अलग जगहियुनि ते ख़ास क़िसिम जी थुलिही सुई फिस्च्यूला नीडल रखी वेंदी आहे ।
• इन फिस्च्यूला नीडल जी मदद सां डायालिसिज़ लाइ रतु बाहिर कढियो वेंदो आहे ऐं साफ करण बइद वापस अंदर मोकिलियो वेंदो आहे ।
• फिस्च्यूला वसीले महिननि खां सालनि ताईं डायालिसिज़ थी सघे थी ।
• फिस्च्यूला कयल हुजे उन हथ सां रोज़ानो हलिक़े क़िसिम जो सभु कमु थी सघे थो ।

अे.वी फिस्च्यूला जी संभाल रखण छो ज़रूरी आहे ?

• क्रोनिक किडनी फेल्यर जे आख़िरीन तबिक़े जे इलाज में मरीज़ खे हिमोडायालिसिज़ कराइणो पवे थो । अहिड़नि मरीज़नि जो जीवन नेमाइतो ऐं घुरिबल डायालिसिज़ ते मदार रखंदड़ बणिजी पवे थो । अे.वी. फिस्च्यूला बराबर नमुने कमु करे त ई डायालिसिज़ लाइ घुरिबल अंदाज़ में रतु हासिल करे सघिजे थो । थोड़े में चइजे त हिमो डायालिसिज़ कराईंदड़ मरीज़नि जो जीवन अे.वी. फिस्च्यूला जे योग्य कमु करण जी शक्तिअ ते आधार रखे थो ।
• अे.वी. फिस्च्यूला में फुंडियल नसि में वधीक दाब सां, घणे अंदाज़ में रतु वहे थो । जेकडहिं अे.वी. फिस्च्यूला खे इतिफाक़ सां ईज़ाऊ पहुचे त फुंडियल नसि मां थोड़े वक़्ति में तमामु घणो रतु बाहिर निकरी वञण जो ख़तिरो रहे थो । इन नमुने घणे अंदाज़ में तेज़ीअ सां निकिरंदड़ रतु खे जेकडहिं यकिदम क़ाबूअ में आंदो न वेंदो त थोड़नि ई मिनटनि में मौतिमार थी सघे थो ।

अे.वी फिस्च्यूला जो लंबे अरिसे ताईं संतोषकारक उपियोग करे सघिजे इन लाइ कहिड़ी संभाल वठणु घुरिजे ?

अे.वी. फिस्च्यूला जी मदद सां लंबे अरिसे (सालनि ताईं ) डायालिसिज़ लाइ घुरिबल अंदाज़ में रतु हासिल करे सघिजे इन लाइ फिस्च्यूला में हेठीअं रीत संभाल करणु ज़रूरी आहे :

• बीमारी न थियणु डियणी
• * फिस्च्यूला वारे हथ खे साफि रखिणो रोज़ ऐं हिमो डायालिसिज़ खां पहिरीं हथ खे जीविड़नि मार साबुण सां साफि करणो ।
• * हिमो डायालिसिज़ खां पोइ रतु न निकिरे इन लाइ बधण में ईंदड़ पट्टो (Torrniquet) वधीक वक़्ति ताईं बधो वञे ते फिस्च्यूला बंद थी वञण जो डपु रहे थो ।
• अे.वी. फिस्च्यूला जी संभाल रखिणी
• अे.वी. फिस्च्यूला जो फक़ति डायालिसज़ करण में ई इस्तेमाल करिणो । फिस्च्यूला कयल हथ में कडहिं बि इञेक्शन या बाटिला न लगाइणा या उन हथ मां जांच लाइ रतु न वठिणो ।
• फिस्च्यूला कयलु हुजे उन हथ ते रतु जो दाबु न मापिणो ।
• फिस्च्यूला खे को बि ईज़ाऊ न पहुचे, उन जो ध्यान रखिणो उन हथ ते घड़ियाल​, ज़ेवर (कड़ो,चूड़ियूं वगै़रह​) या दाबु पैदा कनि अहिरा पट्टा न पाइणा । जेकडहिं फिस्च्यूला खे इतिफाक़ सां ईज़ाऊ थिए ऐं रतु तकिड़ो वहण लगे त बिना घबिराइण जे सभ खां अवलि बिए हथ सां ज़ोर सां दाब डेई वहंदड़ रतु खे बंदि करिणो । उन खां पोइ जितां रतु निकिरंदो हुजे उन जगह ते हिमो डायालिसिज़ खां पोइ यकिदम डाक्टर जो संपर्क करिणो । रतु बंदि करण जे बदिरां , वहंदड़ रतु सां डाक्टर वटि यकिदम डोड़ी वञण में ख़तिरो आहे ।
• फिस्च्यूला कयलु हुजे उन हथ सां वज़नदार शयूं न खणिणियूं ऐं फिस्च्यूला ते वधीक ज़ोर न अचे, उन जो ध्यान रखिणो । ख़ासि करे राति जो सुम्हिण वक़्ति उहो हथु दबिजी न वञे, उन जो ध्यान रखिणो ।
• फिस्च्यूला जी कमु करण जी ताक़त सुञाणिणी
• फिस्च्यूला कयलु हुजे, अहिड़े हरहिक मरीज़ खे डींहं में टे दफ़ा (सुबुह​, मंझंदि, राति) फिस्च्यूला बराबर हले थो या न उन जी ज़रूर ख़ातिरी करे वठणु घुरिजे । जेकडहिं फिस्च्यूला ओचितो ई ओचितो बंदि थी वञे त इन नमुने जी सावधानीअ सां उन जो निदान थोड़नि कलाकनि में ई थी वेंदो आहे । बंदि थी वियल फिस्च्यूला तकिड़े निदान ऐं योग्य इलाज सां वरी कमु कंदी थी सघंदी आहे ।
• रतु जे दाब में थींदड़ गौ़र करण जेतरी घटि जे करे सुठे नमुने कमु कंदड़ फिस्च्यूला बिल्कुल कमु करणु बंदि करे छडे, अहिड़ो डपु रहंदो आहे । तंहिंकरे रतु जे दाब में गौ़र करण जेतिरी घटिताई न थिए, उन जो ध्यानु रखिणो ।
• नेमाइती कसिरत​

फिस्च्यूला ठाहिण खां पोइ नसि फुंडे ऐं घुरिबल अंदाज़ में रतु हासिल करे सघिजे, इन लाइ हथ जी कसिरत ज़रूरी आहे । फिस्च्यूला जी मदद सां हिमो डायालिसिज़ शुरू करण खां पोइ बि इन्हीअ सबब जे करे कसिरत चालू रखणु तमामु ज़रूरी आहे ।

ग्राफ्ट (पेबंद​)

• जिन मरीज़नि में हथु जूं नसूं बराबर न हुअण सबबु फिस्च्यूला थी नथी सघे, उन्हनि लाइ हिन ग्राफ्ट जो उपियोग थींदो आहे ।
• हिन पद्वतीअ में ख़ास क़िसिम जे प्लास्टिक जहिड़ी मटीरियल जी ठहियल हथिराधू नसि जी मदद सां आपरेशन करे, हथ या पेर में आयल शरियां या नसि खे गंढे छडिबो आहे ।
• फिस्च्यूला नीडल खे ग्राफ्ट में रखी डायालिसिज़ लाइ रतु हासिल करण लाइ मोकिलियो वेंदो आहे ।
• तमाम महांगी ऐं बीमारी थियण जे वधिक इमिकान जे करे अजु कल्ह हिन पद्वतीआ जो उपयोग तमामु घटि मरीज़नि में थींदो आहे ।

हिमो डायालिसिज़ मशीन जा कहिड़ा कम आहिनि ?

हिमो डायालिसिज़ मशीन जा मुख्य कम हेठीअं रीति आहिनि ।

• डायालिसिज़ मशीन जो पम्प रतु खे साफ करण लाइ रतु हासिल करे ऐं ज़रूरत मूबिजु उन में वधि घटि करण जो कमु करे थो ।
• मशीन ख़ास क़िसिम जी पाणियठु (डायालाइज़ेट​) ठाहे हथिराधू किडनी (डायालाईज़ार​) में मोकिले थी । मशीन वसीले पाणियठु जो गर्मी पद ऐं उन में मइदिनी शयूं बाइकार्बोनेट वगै़रह योग्य अंदाज़ क़ाइम रखियो वेंदो आहे । मशीन हिन डायालाइज़ेट खे मुनासिब अंदाज़ में ऐं मुनासिब दाब सां हथिराधू किडनीअ में मोकिले थी ऐं गै़र ज़रूरी कचिरो दूर करण खां पोइ इन पाणियठु जो नेकाल करे थी । किडनी पेल्यर में नज़र ईंदड़ सोजु वधीक पाणीअ जे करे हूंदी आहे । डायालिसिज़ दरम्यान मशीन वधीक पाणी दूर कंदी आहे ।
• डायालिसिज़ दरम्यान मरीज़ जी सलामती क़ाइण रखणु जीअं त रतु जो लीक थियणु या सरकिट में हवा वगै़रह जुदा-जुदा बंदोबस्त डायालिसिज़ मशीन में रखियल आहिनि ।

हाणे मिलंदड़ कोम्प्यूटराईज़िड हिमो डायालिसिज़ मशीन जे मदद सां डायालिसिज़ जी प्रक्रिया तमामु सविली ऐं आरामदायक नमूने थी सघंदी आहे ।

डायालाइज़र (हथिराधू किडनी ) जी बनावत कहिड़ी हूंदी आहे ? उन में रतु साफ कहिड़े नमुने थींदो आहे ?

डायालाइज़र (हथिराधू किडनीअ) जी बनावत :

• हिमो डायालिसिज़ में डायालिज़र (हथिराधू किडनीअ) में रतु साफ थींदो आहे ।
• डायालाइज़र लगभग 8 इंच डिघो ऐं 1.5 इंच क़तुर वारे शिफाफ प्लास्टिक जे पाईप जो ठहियलु हूंदो आहे । जंहिं में 10,000 जेतिरियूं वारनि जहिड़ियूं सन्हियूं नलियूं रखियल हूंदियूं आहिनि । इहे सन्हियूं पर अंदरां पोरियूं नलियूं ख़ास क़िसिम जे शिफाफ प्लास्टिक (Semi-Permeable membrane) जूं ठहिल आहिनि । इन्हनि सन्हियुनि नलियुनि जे अंदिरां रतु लंघे करे साफ थींदो आहे ।
• डायालाइज़र जे मथिअ छेड़े ते इहे सभु सन्हियूं नलियूं गडु थी हिक वडी नली ठही वेंदी आहे जंहिं सां शरीर मां रतु आणींदड़ ऐं खणी वेंदड़ नलियूं (Blood tubings) गंढिजी सघनि थियूं ।
• डायालाइज़र जे मथिअ ऐं हेठिअ छेड़े वटि पासे डांहुं मशीन मां ईंदड़ ख़ास क़िसिम जो साफ करण लाइ कमु ईंदड़ पाणियठ (डायालाइज़ेट​) दाखिल थी निकिरी सघे इन लाइ नली गंढे सघिजे, अहिड़ी बनावत हूंदी आहे ।

डायालाइज़र (हथिड़ाधू किडनी) में रतु जो साफ थियणु

• शरीर मां साफ थियण लाइ हथिराधू किडनीअ में हिक छेड़े खां ईंदड़ रतु हज़ारे सन्हियुनि नलियुनि में विरिहाइजी वेंदो आहे । हथिराधू किडनीअ जे बिऐं छेड़े खां दाब सां दाख़िल थींदड़ सफाईअ जो कमु कंदड़ डायालाइज़ेट सन्हियुनि नलियुनि जे आसापस विरिहाइजी वेंदो आहे ।
• हर मिनिट में अटिकल 300 मि.लि. रतु ऐं 600 मि.लि. डायालाइज़ेट हथिराधू किडनीअ में मथां खां हेठि ऐं डायालाइज़ेट हेठां खां मथे ईअं लगातार हिक बिए जे उबतड़ि रूख़ में वहंदा रहंदा आहिनि ।
• इन दरम्यान सन्हियूं नलियूं सेमी परमीबल मेम्ब्रेन जे ठहियल हुअण सबबु रतु में आयल युरिया -क्रिअटेनिन जहिड़ियूं इख़िकाजी शयूं, वधीक जो पाणी ऐं गै़र ज़रूरी मइदिनी शयूं डायालाइज़ेट में गडिजी बाहिर निकरी वेंदियूं आहिनि । इन तरह हथिराधू किडनीअ में हिक छेड़े खां दाख़िल थींदड़ ख़राब रतु बिए छेड़े खां निकिरे तडहिं साफ थी वेंदो आहे ।
• डायालिसिज़ जी प्रक्रिया में शरीर जो समूरो रतु अटिकल बारहां दफ़ा साफ थींदो आहे । चइनि कलाकनि जी पछाड़ीअ में रतु में आयल यूरिया ऐं क्रिअटीनिन जो अंदाज़ चङो घटिजी वञण सबबु रतु साफ थी वेंदो आहे ।

हिमो डायालिसिज़ में कमु ईंदड़ ख़ास क़िसिम जो डायालाइज़ेट छा आहे ?

• डायालाइज़ेट हिक ख़ास क़िसिम जी पाणियठु आहे, जेका हिमोडायालिसिज़ में गै़र ज़रूरी ऐं इख़िराजी शयुनि जो नेकाल करे थी ।
• हिमोडायालिसिज़ लाइ ख़ास क़िसिम जो मइदिनी लूणनि वारो पाणी (हिमो कोन्सेन्ट्रेट​) डह लिटरनि जी प्लास्टिक जी बरिणीअ में मिलंदो आहे ।
• डायालिसिज़ मशीन में ख़ास क़िसिम जी पाणियठु जो हिकु हिस्सो चोटीह हिस्सा पाणी मिलाए डायालाइज़ेट ठाहींदो आहे ।
• डायालाइज़ेट हिक ख़ास क़िसिम जी पाणियठु हूंदी आहे, उन में मइदिनी लूण ऐं बाइकार्बोनेट जो अंदाज़ शरीर जे ज़रुरी अंदाज़ जेतिरो रखियो वेंदो आहे ।
• डायालाइज़ेट ठाहिण लाइ कमु ईंदड़ पाणी मइदिनी लूणनि खां सवाण नरम ऐं साफ बणाइण लाइ ख़ास क़िसिम जे आर​.ओ (Reverse Osmosis) प्लान्ट जो उपियोग कयो वेंदो आहे ।

हिन आर​.ओ. प्लान्ट में पाणी सेन्ड (रेती) फिल्टर​, चारकोल फिल्टर​, माइक्रो फिल्टर​, डिआयोनाईज़र​, आर​.ओ., मेम्ब्रेन ऐं यु.वी. (Ultraviolet) फिल्टर मां लघंदे नरम​, शुद्व (साफ​) ऐं बिल्कुल जीविड़नि खां मुक्त बणिजे थो ।

• डायालिसिज़ में कमु ईंदड़ पाणी बिल्कुल साफ हुअणु ज़रूरी आहे, छाकाणि त हरहिक डायालिसिज़ दरम्यान 150 लिटर जेतिरो पाणी कमु ईंदो आहे ।
• पाणीअ जो हिन नमुने साफ थियणु हिमोडायालिसिज़ असिराइते नमुने बिना साइड इफेक्ट जे थिए, उन लाइ तमाम अहिमियत वारो आहे ।

हिमोडायालिसिज़ किथे कयो वेंदो आहे ?

रवाजी तोर हिमोडायलिसिज़ हास्पीटल (इस्पताल​) में माहिर स्टाफ द्वारां नेफ्रोलाजिस्ट जी हिदायत ऐं नज़रदारीअ हेठि कयो वेंदो आहे । तमामु घटि (थोड़ा) मरीज़ पंहिंजे घर में ई मशीन ख़रीद करे ऐं उन जी ट्रेनिंग (तालीम​) वठी कुटुंब जे भातियुनि जी मदद सां डायालिसिज़ कनि था । हिन क़िसिम जे डायालिसिज़ खे हो म हिमो डायालिसिज़ चइबो आहे , जंहिं लाइ तमाण घणे ख़र्च ऐं तालीम ऐं वक़्त जी ज़रूरत पवंदी आहे ।

छा हिमोडायालिसिज़ पीड़ा डींदड़ ऐं डुखियो इलाजु आहे ?

न​, हिमोडायालिसिज़ सविली ऐं पीड़ा न पहुचाईंदड़ प्रक्रिया आहे । उन में फक़ति सुई हणण वक़्त थोरो ईज़ाउ (सुर​) थींदो आहे । रवाजी तोर लंबे अरिसे लाइ डायालिसिज़ जी ज़रूरत हुजे अहिड़ा मरीज़ डायालिसिज़ कराइण लाइ हास्पीटल ईंदा आहिनि ऐं डायालिसिज़ पूरो थियण सां घर वापसि वेंदा आहिनि । घणे भाङे मरीज़ डायालिसिज़ दरम्यान जो चइनि कलाकनि जो वक़्तु निंड​-आराम करण में , संगीत बुधण​, टी.वी. डिसणु या मन पसंद साहित्य पढ़िहण में गुज़ारींदा आहिनि । डायालिसिज़ दरम्यान घणे भाङे मरीज़ हल्को नास्तो, चांहि या कोल्ड ड्रिंक वठणु पसंद कंदा आहिनि ।

रवाजी तरह हिमोडायालिसिज़ दरम्यान कहिड़ियूं तकिलीफ़ुं पेश ईंदियूं आहिनि ?

डायालिसिज़ दरम्यान केतिराई दफ़ा नज़र ईंदड़ तकिलीफुनि में रतु जो दाबु घटिजी वञणु, पेरनि में साड़ो-सूर थियणु-कमिज़ोरी महिसूस थियणु, उलिटी-उबिथा थियणु वगै़रह जहिड़ियुनि तकिलीफुनि जो समावेश थिए थो ।

हिमोडायालिसिज़ जा मुख्य फाइदा ऐं नुक़िसान कहिड़ा-कहिड़ा आहिनि ?

• हिमोडायालिसिज़ स्टाफ नर्स या डायालिसिज़ टेकनीशियन द्वारां कयो वेंदो आहे, तंहिंकरे मरीज़ लाइ वधीक सहोलियत भरियो ऐं सलामति हूंदो आहे ।
• हिमोडायालिसिज़ बियनि डायालिसिज़ जी मुशाहिबत में घटि वक़्त वठे थो ऐं वधीक तकिड़ो थिए थो ऐं वधीक असिराइतो थिए थो ।
• हिमोडायालिसिज़ सेन्टर में ईंदड़ मरीज़ हिक बिए सां गाल्हाए सघंदा आहिनि, इन करे उन्हनि खे मानसिक ताण घटि रहंदी आहे ।
• हिमोडायालिसिज़ रोज़ानो न पर हफिते में फक़ति टे दफ़ा ई कयो वेंदो आहे ।
• बीमारी थियण जो इमिकान घटि रहे थो ।
• ही पेरीटोनियल डायालिसिज़ खां घटि ख़र्च वारो हुअण सबबु हिमोडायालिसिज़ वधि में वधि मरीज़नि में कयो वेंदो आहे ।

हिमो डायालिसिज़ जा नुक़िसान

• हरहिक गोठ में मैसर न हुअण सबबु बिए शहर वञिणो पवे थो, जंहिं करे तकिलीफ थिए थी ।
• इलाज लाइ इस्पताल वञिणो पवे थो ऐं मुक़रिर वक़्त जो पालन करिणो पवे थो ।
• हर दफ़े फिस्च्यूला नीडल हणाइणी पवे थी, उन जो सूर सहिणो पवे थो ।
• खाधे जी वधीक परहेज़ रखिणी पवे थी, उन में मरीज़ खे पाणियठु जो अंदाज़ घटि वठिणो , पोटेशियम​, लूणु ऐं फास्फोरस वारा खाधा घटि खाइणा पवनि था ।
• हिपेटाईटस जे बीमारीअ जो इमिकान रहे थो ।
• हिमो डायालिसिज़ युनिट शुरु करणु महांगो आहे ऐं उन खे हलाइण लाइ माहिर स्टाफ ऐं डाक्टर जी ज़रूरत पवंदी आहे ।

हिमोडायालिसिज़ जे मरीज़नि लाइ अहिमियत वारियूं गाल्हियूं

• नेमाइतो हिमोडायालिसिज़ लंबे अरिसे जी तंदुरस्ती लाइ ज़रूरी आहे, उन में बेतरितीब या फेरिफार लंबे अरिसे लाइ नुक़िसानकार थी सघे थो ऐं कडहिं मरीज़ जो मौत पिणु थी सघे थो ।
• बिनि डायालिसिज़ जे वचि में खाधे में मुनासिब परहेज़ (पाणियठु ऐं लूणु घटि वठणु) द्वारां वज़न जो इज़ाफ़ो (वाधि) क़ाबूअ में रखणु ज़रूरी आहे । इन खां सवाइ पोटेशियम ऐं फ़ासिफ़ोरस वारो खाधो घटि खाइणु ऐं प्रोटीन वारा खाधा वधीक वठणु घुरिजनि ।
• रवाजी तरह डायालिसिज़ जे मरीज़नि में ख़ौरश जी कमी (Malnutrioton) वधीक डिसण में ईंदी आहे । खाधे में घुरिबल अंदाज़ में प्रोटीन न वठमु ऐं डायालिसिज़ दरम्यान प्रोटीन जो नेकाल थियण सां ख़ौरिश जी कमी थी सघे थी, इन लाइ जेके मरीज़ नेमाइतो (Regular) डायालिसिज़ कराईंदा रहंदा आहिनि उन्हनि खे वधीक प्रोटीन वारा खाधा वठणु ज़रूरी आहिनि ।
• नेमाइतो डायालिसिज़ कराईंदड़ मरीज़नि खे डाक्टर जी सलाह मूजिबु विटामिन बी ऐं विटामिन सी जूं दवाऊं वठणु ज़रूरी आहिनि । डाक्टर जी सलाह खां सवाइ बियूं विटामिन जूं दवाऊं न वठिजनि, छाकाणि त ईअं बि थी सघे थो त उन में घुरिबल अंदाज़ में विटामिन न पिणु हुजनि ऐं उहे डायालिसिज़ वारे मरीज़ लाइ नुक़िसानकार पिणु थी सघनि थियूं ।
• केल्शियम , फासिफोरस ऐं पेराथाराईड हार्मोन जो केतिरो अंदाज़ आहे, उहो डिसी करे डायालिसिज़ कराईंदड़ मरीज़नि खे केल्शियम ऐं विटामिन डी जूं दवाऊं वठिणियूं ।
• मरीज़ खे पंहिंजी रोज़ानी ज़िन्दगीअ में कुझ फेरिफार करणु लाज़िमी बणिजी वञनि था जीअं त बीड़ी सिगिरेट न छिकणु, शराबु न वरिताइणु, वज़नि कंट्रोल में रखणु ऐं नेमाइतो कसिरत करणु ।

हिमोडायालिज़ कराईंदड़ मरीज़नि खे डाक्टर या नर्स जो संपर्क कडहिं करिणो ?

हेठियुनि मां का बि तकिलीफ थिए त मरीज़ खे यकिदम डाक्टर या नर्स जो कोन्टेक्ट करणु घुरिजे :

• अे.वी. फिस्च्यूला या केथेटर कयलु हुजे, उतां ओचितो ई ओचितो रतु जो वहणु ।
• अे.वी. फिस्च्यूला में थ्रिल (Thrill) , लरिज़शि (Vibration) वगै़रह महिसूस न थियणु ।
• ओचितो ई ओचितो वज़नु वधी वञणु, सोजु थियणु या साहु चढ़िही वञणु ।
• छातीअ में सूर​, दिल जी दकि-दकि वधी वञणु या घटिजी वञणु ।
• रतु जो दाबु तमामु घटिजी वञणु या वधी वञणु ।
• मरीज़ मुंझियलु, निंडाखिड़ो, बेहोश या डकिणी वठी वञणु ।
• बुख़ार , थधि, वधीक उल्टियूं थियणु, कमिज़ोरी महिसुस करणु या उल्टियुनि में रतु अचणु ।

स्रोत : किडनी एजुकेशन