बा॒रनि खे राति जो बिस्तरे में पेशाब थी वञणु

बा॒रि नंढो हूंदो आहे तड॒हिं राति जो बिस्तरे (हंध​) ते पेशाब करे छडे॒, इहो स्वभाविक आहे । पर बा॒र जी उम्र वधण खां पोइ बि राति जो बिस्तरे में पेशाब करे त उहो उन बा॒र ऐं संदसि माता-पिता लाइ शर्म ऐं चिंता जो विषय आहे । घणे भाङे बा॒रनि में उम्र सां गडो॒गडु॒ इहो मसइलो बिना कंहिं इलाज जे मिटी वेंदों आहे । खुश क़िस्मतीअ सां घणे भाङे बा॒रनि में इहो मसइलो किडनीअ जी कंहिं बीमारीअ करे न थींदो आहे ।

इहो मसइलो केतिरनि बा॒रनि में नज़र ईंदो आहे ऐं इहो कड॒हिं मिटिजंदो आहे ?

• रवाजी तरह ६ सालनि खां नढी उम्र जे बा॒रनि में इहो मसइलो नज़र ईंदो आहे ।
• ५ सालनि खां वडी॒ उम्र जे १०-१५% बा॒रनि में हीअ तकिलीफ नज़र ईंदी आहे ।
• रवाजी तरह उम्र वधण सां इहो मसइलो पंहिंजो पाणे ही घटिजंदो वेंदो आहे ऐं मिटिजी वेंदो आहे ।
• १० सालनि जी उम्र में इहो मसइलो ३% ऐं १५ सालनि खां वडी॒ उम्र में १% खां घटि बा॒रनि में इहा तकिलीफ नज़र ईंदी आहे ।

ही मसइलो बा॒रनि में कड॒हिं वधीक नज़र ईंदो आहे ?

• जिनि बा॒रनि जे माउ-पीउ में उन्हनि खे बचपन (नंढपुणि) में इहा तकिलीफ नज़र आई हुजे ।
• जिनि बा॒रनि जे मग़ज़ जो विकास देरि सां थींदो हुजे त उन्हनि बा॒रनि खे मसाने में पेशाब भरिजी वियो आहे, उन जी समझि न रहंदी आहे ।
• गहरी निंड ईंदी हुजे, अहिड़नि बा॒रनि में हीअ तकिलीफ वधीक नज़र ईंदी आहे ।
• छोकरियुनि खां छोकिरनि में ही मसइलो टीणो वधीक नज़र ईंदो आहे ।

नंढनि बा॒रनि खे राति जो बिस्तरे में पेशाब थी वञणु मामूली गा॒ल्हि आहे, का बीमारी न आहे ।

• मानसिक छिक जे करे घणाई दफ़ा ही मसइलो शुरु थींदो या वधंदो नज़र ईंदो आहे ।
• माम थोड़नि (2-3 %) बा॒रनि में कंहिं बीमारीअ जीअं त मूत्र मार्ग जो इन्फेक्शन​, डायाबिटीज़​, किडनी फेल्यर , कब्ज़ी, मसानो नंढो हुअणु, करंघे (Spinal cord) में का ख़ामी हुजे, बलाऊँ (Pin Worms) थियणु या छोकिरनि में युरेथ्रल वाल्व में नुक़्स (ख़ामी) करे ही मसइलो थी सघे थो ।

बिस्तरे में पेशाब थींदो हुजे ते बा॒र जी कड॒हिं ऐं कहिड़ी तपास कराइणु ज़रूरी आहे ?

किनि बा॒रनि में ई तपास कराइण जी ज़रूरत पवंदी आहे, जिनि में बिस्तरे में पेशाब थी वञणु जो कारणु का बीमारी हूंदी आहे । रवाजी तरह रतु में खंडि जी तपास​, पेशाब जी तपास , करंघे जो अेक्स - रे, सोनोग्राफी या किडनी ऐं मसाने सां वास्तो रखंदड़ बी॒ का बि तपास कराई वेंदी आहे ।

इलाज :

हीअ तकिलीफ का बीमारी न आहे या बा॒र जा॒णी वाणी बिस्तरे में पेशाब न कंदो आहे । तंहिं करे बा॒र खे धमिकाइण या गुस्से थियण जे बदिरां , हिन तकिलीफ जे इलाज जी शुरुआत हमिदर्दी ऐं ख़बरदारीअ सां कई वेंदी आहे । इलाज जी शुरुआत में पहिरियाईं बा॒र खे समिझाणी ऐं प्रोत्साहन डि॒जे, पाणी वठण ऐं पेशाब लाइ वञण जी आदत में फेरिफार कजे ऐं तंहिं हूंदे बि इहा तकलीफ रहे त डॉकटर जी सलाह मूजिबु दवा वठिजे ।

समिझाणी ऐं प्रोत्साहन​

• बा॒र खे हिन तकिलीफ बाबत सही समिझ डि॒यणु ज़रूरी आहे ।
• पेशाब बिस्तरे में थी वजे थो, उन में बा॒र जो डो॒हु न आहे । उन लाइ हुन ते गु़स्से थियण या धमिकाइणु न खपे, छाकाणि त ईंअ करण सां बा॒रि वधीक डिजी॒ सघे थो ।
• इन तकिलीफ में असां खे इहो ध्यान रखणु घुरिजे त बि॒या बा॒र हुन खे चेढ़ाईन न या मज़ाक (मस्ती) न कनि ।
• बा॒र ते मानसिक दाबु॒ घटि कजे ऐं समझाइजे त सजो॒ परिवार हुन सां गडु॒ ई आहे ऐं इहा तकिलीफ थोड़े वक़्त में मिटिजी वेंदी ।
• राति जो कमरे (रूम​) में योग्य लाईट चालू रखिजे जीअं बा॒र खे बाथरूम ताईं वञण में सहूलियत रहे ।
• सुम्हण खां अगि॒ में पासे में कपड़नि जी हिक वधीक जोड़ी, चादर ऐं नेप्कीन रखिजे जीअं रात जो ख़राब थियल कपिड़ा मटाइण में सहूलियत रहे ।
• चादर जे हेठां प्लास्टिक विछाइजे जीअं चादर ख़राब न थिअे ।
• चादर जे हेठां हिकु वडो॒ ऐं थुल्हो रूमाल (टुवाल​) रखिजे जीअं पेशाब चूसिजी वञे ।
• बा॒र खे हर रोज़ सुबूह जो स्नान करण लाइ चइजे जीअं पेशाब जी बांस न अचे ।
• जंहिं रात जो बा॒र बिस्तरे में पेशाब न करे तड॒हिं हुन जी साराह कजे ऐं उन लाइ का नंढी सूखिड़ी डि॒जे, जेका बा॒र जी तकिलीफ दूर करण लाइ प्रोत्साहन डीं॒दी ।
• जेकड॒हिं बा॒र खे क़ब्ज़ रहंदो हुजे त उन डां॒हं लापरवाह न थिजे पर सही इलाज करणु घुरिजे ।

पाणियठु वठण में फेरिफार

• राति जो सुम्हण खां २-३ कलाक अगि॒ में बा॒र खे घटि पाणियठु डि॒जे । पर डीं॒हं जो वधीक पाणियठु डि॒जे ।
• कोफिन (चांहिं, काफी), गैस वारा कोल्ड ड्रिंक्स ऐं चाकिलेट राति जे वक़्त​ डि॒यण खां टाड़िजनि । इन्हनि शयुनि जे करे पेशाब वधीक थियणु ऐं उहो पेशाब राति जो बिस्तरे में थी वञण जो इमिकान पिणु रहंदो आहे ।

पेशाब वञण जी आदत में तबिलील

• राति जो सुम्हण खां अगि॒ में हमेशह पेशाब करे सुम्हण जी आदत विझिजे ।
• डीं॒हं दरम्यान कुझ कुझ वक़्त खां पोइ पेशाब करे अचण जी आदत विझिजे ।
• इन खां सवाइ राति जो बा॒र खे उथारे २-३ दफ़ा पेशाब कराअे छड॒ण सां बिस्तरे में पेशाब न थींदो ।
• बा॒र खे डाइपर पहिराइण सां राति जो बिस्तरे खे आलो थियन खां अटिकाअे सघिजे थो ।
• बा॒रि अटिकल जंहिं वक़्त ते बिस्तरे ते पेशाब करे, बि॒यो दफ़ो उन वक़्त ते बा॒र खे उथारे ऐं पेशाब कराइ छड॒णु घुरिजे ।
• हर रोज़ राति जो सुम्हण खां पोइ हर टीं कलाकें बा॒र खे उथारे पेशाब कराइजे ऐं मुमकिन हुजे त अलार्म पिणु रखिजे ।

अलार्म सिस्टम​

• पेशाब थियण सां निकर (Under wear) आली थिअे त यकिदम उन सां गं॒ढियल बेल वजे॒, इन किसिम जी अलार्म सिस्टम विकासशील देशनि में मयसर आहे । पेशाब थियण जो चिताव बा॒रि जा॒णी करे यकिदम पेशाब खे रोके वठंदो आहे ।
• इन क़िसिम जा साधन घणो करे ७ सालनि खां वडी॒ उम्र जे बा॒रनि लाइ कमु आणिबा आहिनि ।
• इन क़िसिम जी तालीम (सिस्टम​) सां इहो मसइलो जल्द हलु थी सघंदो आहे ऐं बिस्तरे आले थियण खां अगि॒ बा॒रि जागी॒ पवंदो आहे .

अलार्म सिस्टम ऐं दवा ज़रीये इलाजु रवाजी तरह सतनि सालनि जी उम्र खां वड॒नि बा॒रनि में कमु ईंदा आहिनि ।

मसाने जी तालीम​

• घणनि बा॒रनि में मसाने में घटि पेशाब मापी सघंदो आहे । हिन तालीम जो मक़िसद मसाने जी गुंजाइश वधाइण जो आहे ।
• अहिड़नि बा॒रनि खे डीं॒हं दरम्यान पेशाब लगे॒ त रोके रखणु, पेशाब थोड़ो करे विच में रोके रखणु वगै़रह जहिड़ियूं पेशाब जूं कसिरतूं करण जी सलाह डि॒नी वेंदी आहे । इन क़िसिम जे कसिरतुनि जे करे मसाने मज़बूत बणिजे थो । उन जी पेशाब खे समाइण जी गुंजाइश वधंदी आहे ऐं पेशाब ते ज़ाबितो वधे थो ।

दवा ज़रीये इलाजु

मथियुनि कोशिशुनि जी नाकाम्याबीअ बइद दवा जो उपयोग कबो आहे ऐं ७ सालनि खां वडी॒ उम्र जे बा॒रनि में कबो आहे । दवाऊँ असरदायक हूंदियूं आहिनि, पर उहे मसइले खे मिटाअे नथियूं सघनि । दवाऊँ बंद करण सां पोइ इहो मसइलो वरी थी सघे थो । इन करे दवा खां अलार्म सिस्टम वधीक सलाह भरियो आहे इन लाइ कमु ईंदड़ मुख्य दवाउनि में इमेप्रेमिन ऐं डेस्मो प्रेसिन जो समावेश थिअे थो । इन खां सवाइ ओज़ीब्युटीन पिणु कमु ईंदी आहे ।

डेस्मोप्रोसिन अेसेटेट​

जड॒हिं बि॒अे इलाज सां कामियाबी न मिलंदी आहे तड॒हिं हीअ दवा डि॒नी वेंदी आहे । इन दवा वठण करे राति जो पेशाब घटि ठहंदो आहे । जिनि बा॒रनि में राति जो पेशाब वधीक ठहंदो आहे उन्हनि लाइ हीअ दवा तमाम काराइती आहे । इहा दवा चालू हुजे तड॒हिं बा॒रनि खे समिझाइजे त शाम जे वक़्त पाणी घटि पीअनि ऐं हीअ दवा सुम्हण खां अगि॒ में डि॒नी वेंदी आहे । कंहिं सबब जे करे जेकड॒हिं बा॒र डीं॒हं दरम्यान वधीक अंदाज़ में पाणी पीतो हुजे तड॒हिं इहा दवा न डि॒जे । हीअ दवा राति जो बिस्तरे में थींदड़ पेशाब खे रोकण लाइ अक्सीर हूंदे पिणु, तमाम महांगी हुअण सबबु सभु बा॒र इहा कमु आणे नथा सघनि ।

बिस्तरे में पेशाब लाइ दवा ज़रीये इलाजु असिराइतो वसीलो आहे थोड़े वक़्त जे फायदे लाइ पर उन सां मिटिजी नथी सघे ।

इमी प्रेमिन​

हिन दवा जो उपयोग सतनि सालनि खां वधीक उम्र जे बा॒रनि में ई कयो वेंदो आहे । हीअ दवा मसाने जे मुखिकिन खे मज़बूत करे थी, जंहिंकरे मसाने में वधीक मापी सघे थो । इन खां सवाइ इहा दवा पेशाब न लहे इन लाइ जवाबदार मुशकिन खे वधीक सुसण में मदद करे पेशाब थियण खे रोके थी । इहा दवा डॉक्टरनि जी नज़रदारीअ हेठि अटिकल ३-६ महिननि लाइ डि॒नी वेंदी आहे । इहा दवा तमाम असरदायक आहे पर उन जे साइड इफेक्ट जे करे उन जो उपयोग कड॒हिं-कड॒हिं ई कयो वेंदो आहे ।

ओखिब्युटीन​

हीअ दवा डीं॒ह जो बिस्तरे में पेशाब थी वेंदो हुजे अहिड़नि बा॒रनि में कम ईंदी आहे । हिन दवा जे करे मसाने जी गुजांइश वधंदी आहे ऐं उन जो सुसण घटिजंदो आहे । हिन दवा जे साइड इफेक्ट में वात सुकी वञणु, पघरु निकिरणु ऐं कब्ज़ी थी सघे थी ।

बिस्तरे में पेशाब थी वेंदो हुजे, उन लाइ डॉक्टर जी सलाह कड॒हिं वठणु घुरिजे :

हेठियुनि हालतुनि में उन परिवार खे डॉक्टर जी सलाह वठणु ज़रूरी आहे :

• डीं॒ह दरम्यान बिस्तरे में पेशाब थी वेंदो हुजे ।
• ७ या ८ सालनि जी उम्र खां पोइ बिस्तरे में पेशाब थिअे ।
• हिन तकिलीफ दूर थियण खा ६ महिननि खां पोइ वरी थिअे ।
• लेट्रीन (काकूस​) करण ते पिणु कंट्रोल न रहे ।
• बुख़ार​, सूर​, पेशाब में साड़ो तमाम घणी उञ लग॒णु या मुंहं ते ऐं पेरनि ते सोजु॒ चढ़िही वञणु ।
• पेशाब अटिकी करे अचे या उन वक़्त ज़ोर लगा॒इणो पवे ।

डीं॒हं दरम्यान बिस्तरे में पेशाब जी हालत​, बुख़ार​, पेशाब में साड़ो या अंडनि जी तकिलीफ में डॉक्टर जी सलाह वठणु ज़रूरी आहे ।

स्त्रोत: किडनी एजुकेशन